Georgian Airways ჟურნალი ENG
მოგზაურობა

კვიპროსი / CYPRUS ხმელთაშუაზღვის მარგალიტი, სადაც ისტორია, ბუნება და სტუმართმოყვარეობა ერთიანდება

კვიპროსი / CYPRUS ხმელთაშუაზღვის მარგალიტი, სადაც ისტორია, ბუნება და სტუმართმოყვარეობა ერთიანდება

კვიპროსი — ეს არის პატარა, მაგრამ საოცრად ლამაზი კუნძული ხმელთაშუაზღვის გულში. ის შესანიშნავი ადგილია მათთვის, ვინც ეძებს გამორჩეულ თავგადასავალს, ლამაზ გარემოს, ისტორიულ ადგილებსა და სტუმართმოყვარე მასპინძელს.

კვიპროსის მიწა მრავალი ძველი ცივილიზაციის კერა იყო — აქ ცხოვრობდნენ ძველი ბერძნები, რომაელები, ბიზანტიელები და ოსმალები. მათი კვალი დღესაც ცოცხლობს ქალაქებსა და ისტორიულ ძეგლებში. ნიქოზია, ლიმასი, პაფოსი და სხვა ქალაქები ვიზიტორებს სთავაზობენ გამორჩეულ არქეოლოგიურ ადგილებს, ძველ ტაძრებსა და ციხეებს. აქ ისტორია ხელშესახებია, მოგზაურობა კი ახალი თავგადასავალი.

კვიპროსის ყველაზე მნიშვნელოვანი ქალაქების გაცნობას ნიქოზიადან ვიწყებთ. დედაქალაქი და ერთადერთი ქალაქი ხმელთაშუაზღვის რეგიონში, რომელიც ჯერ კიდევ დაყოფილია ორ ნაწილად — საბერძნეთით მართული სამხრეთით და თურქეთით მართული ჩრდილოეთით. (ნიქოზიას ჩრდილოეთი ნაწილი ფუნქციონირებს, როგორც ჩრდილოეთ კვიპროსის დედაქალაქი, რომელსაც საერთაშორისო საზოგადოება არ აღიარებს და თურქეთის მიერ ოკუპირებულ ტერიტორიად მოიაზრება.) ნიქოზია არის კულტურის და ისტორიის ცენტრალური წერტილი, სადაც მუზეუმები, ბაზრები და ძველი არქიტექტურა ერთმანეთთან ჰარმონიაშია.

ქალაქი ლიმასოლი კვიპროსის ერთ-ერთ მთავარ პორტს და კომერციულ ცენტრს წარმოადგენს. ლიმასოლში თქვენ იხილავთ თანამედროვე ქალაქურ განვითარებას, სანაპიროებს და ღამის ცხოვრებას, ასევე უძველეს არქეოლოგიურ ადგილებს. აქ კაფეებისა და რესტორნების დიდი არჩევანია, სადაც ხმელთაშუაზღვისპირეთის სამზარეულოს გაცნობა შეგიძლიათ.

პაფოსი ისტორიული ქალაქია, რომელიც იუნესკოს მსოფლიო მემკვიდრეობის ძეგლთა ნუსხაშია. პაფოსი სავსეა რომაული ძეგლებით, მუზეუმებითა და უძველესი ტაძრებით. აქაურობა განსაკუთრებით პოპულარულია მშვიდი და ლამაზი სანაპიროებით.

ლარნაკა პატარა, მაგრამ ძალიან უჩვეულო ქალაქია. ის ცნობილია თავისი ფართო სანაპიროებით, პალმებით მოკაზმული ბულვარებითა და სუფთა, თბილი ზღვით, რაც მას იდეალურ ადგილად აქცევს, როგორც ოჯახური დასვენებისთვის, ისე წყვილებისა და დამოუკიდებელი მოგზაურებისთვის.

რა გამოარჩევს კვიპროსს? ამ კითხვაზე პასუხი მარტივია. კვიპროსი უნიკალური ბუნებით, ოქროსფერი სანაპიროებით, გამჭვირვალე ცისფერი ზღვითა და მწვანე მთებით გამოირჩევა. აქაურები თბილი და გულწრფელი სტუმართმოყვარეობით არიან ცნობილები, რომლებიც სტუმრებს ისე ეპყრობიან, როგორც ოჯახის წევრებს. კვიპროსის სამზარეულო კი, განსაკუთრებით, ჰალუმი ყველი, ცეცხლზე მომზადებული კერძები და ადგილობრივი ღვინო გულგრილს ვერავის ტოვებს.

კვიპროსი განსაკუთრებით კომფორტულია აპრილიდან ოქტომბრამდე. ამ დროს ამინდი მზიანი, თბილი და სასიამოვნოა. ზაფხულის თვეები (ივლისი-აგვისტო) ცხელი და უფრო დატვირთულია ტურისტებით, თუმცა, სანაპიროებზე ფესტივალები და მუსიკალური ღონისძიებები ტარდება, რაც დასვენებას კიდევ უფრო საინტერესოს ხდის.

და მაინც, რომელი სანაპიროები გამოირჩევა? პასუხის მოძებნაში ჩვენ დაგეხმარებით.

ქორალ ბეის ოქროსფერ ქვიშაზე წოლა ნამდვილი სიამოვნებაა. ეს ადგილი სრულად აღჭურვილია თანამედროვე ინფრასტრუქტურით, რაც უზრუნველყოფს დამსვენებელთა მაქსიმალურ განტვირთვას. მათთვის, ვისაც აქტიური დასვენება უფრო იზიდავს, სანაპირო ფართო არჩევანს სთავაზობს წყლის სპორტის სახეობებითაც. მიუხედავად მისი დიდი პოპულარობისა ტურისტებში, ქორალ ბეი ინარჩუნებს წესრიგს და სისუფთავეს. სანაპიროს მახლობლად განლაგებულია ბარები, კაფეები და რესტორნები, რაც საშუალებას გაძლევთ ისიამოვნოთ, როგორც ადგილობრივი, ისე საერთაშორისო სამზარეულოთი – ზღვის ხედით.

ნისი ბიჩი კვიპროსის ერთ-ერთი ყველაზე პოპულარული სანაპიროა, რომელსაც მინიჭებული აქვს „ლურჯი დროშის“ სტატუსი (სუფთა წყლებისთვის). ეს სანაპირო გრძელდება მთელ ყურეზე. სახელი დაერქვა პატარა კუნძულ ნისის გამო, რომელიც სანაპიროსთან ძალიან ახლოს მდებარეობს. აქ მთელი ზაფხულის განმავლობაში ტარდება ცოცხალი მუსიკალური ღონისძიებები, ქაფის წვეულებები და სპორტული აქტივობები, რაც მას განსაკუთრებით პოპულარულს ხდის ახალგაზრდებში. ასევე, შესაძლებელია წყლის სპორტით დაკავება.

კურნი ბეის სანაპირო გრძელი ქვიან-კენჭოვანი სანაპიროა, რომელიც მდებარეობს უძველესი კურნიონის ქალაქის სიახლოვეს, დაახლოებით 17 კმ დასავლეთით ლიმასოლიდან. ის ცნობილია თავისი ბუნებრივი სილამაზით, მათ შორის თეთრი კლდეებით. პოპულარულია ვინდსერფინგისა (windsurfing) და ქაიტსერფინგის (kitesurfing) მოყვარულებში, რადგან სანაპიროზე ხშირია ძლიერი ქარი. სანაპიროს ზემოთ, კლდეზე განლაგებულია უძველესი კურიონის თეატრი, რაც მის უნიკალურობას კიდევ უფრო უსვამს ხაზს.

კვიპროსი არის ადგილი, სადაც თქვენ შეგიძლიათ შეხვდეთ ისტორიას, დატკბეთ ბუნების სილამაზით და გემრიელ კერძებთან ერთად შეიქმნათ დაუვიწყარი მოგონებები.

კიდევ წაიკითხეთ

„ჯორჯიან ეარვეისმა“ თბილისიდან რომისა და ფორლის მიმართულებით პირდაპირი ფრენები დაიწყო
ავიაცია

„ჯორჯიან ეარვეისმა“ თბილისიდან რომისა და ფორლის მიმართულებით პირდაპირი ფრენები დაიწყო

ავიაკომპანია „ჯორჯიან ეარვეისმა“ თბილისიდან იტალიის ქალაქ ფორლის მიმართულებით პირდაპირი ფრენები დაიწყო. პირველი პირდაპირი რეისი 24 აპრილს თბილისის საერთაშორისო აეროპორტიდან შესრულდა.